အဲဗာတန်ခံစစ်မှူး မီနာကို တိုက်ရိုက်ဝေဖန်ခဲ့တဲ့ အာဆင်နယ်တိုက်စစ်မှူး ဂျီးဆပ်စ်
11:23 AM, 21 July
ပြီးခဲ့တဲ့တနင်္ဂနွေနေ့၊ ဘယ်လ်တီမိုးမှာကစားခဲ့တဲ့ အာဆင်နယ်နဲ့ အဲဗာတန်တို့ ရာသီကြိုခြေစမ်းပွဲစဉ်အတွင်း သူ့ကို တိုက်ခိုက်ခဲ့ခြင်းနှင့် စော်ကားပြောဆိုခဲ့ခြင်းများအတွက် အသင်းဖော်ဟောင်း၊အဲဗာတန်ခံစစ်မှူး မီနာကို အာဆင်နယ်တိုက်စစ်မှူး ဂျီးဆပ်စ်က တိုက်ရိုက်ဝေဖန်တိုက်ခိုက်ခဲ့ပါတယ်။
ယင်းပွဲစဉ်မှာ ဂျီးဆပ်စ်ရဲ့ ထိပ်တန်းသွင်းဂိုးတစ်ဂိုးအပါအဝင် အာဆင်နယ်က အဲဗာတန်ကို နှစ်ဂိုးပြတ်အနိုင်ရခဲ့ပါတယ်။ ဒါပေမယ့် တိုက်စစ်မှူးဂျီးဆပ်စ်ကတော့ ပွဲကစားချိန်အတွင်း အသက်-၂၇ နှစ်အရွယ် ကိုလံဘီယာနောက်ခံလူရဲ့ အပြုအမူတွေနဲ့ ပတ်သက်ပြီး မပျော်ရွှင်ခဲ့ရပါဘူး။
မီနာနဲ့ ဂျီးဆပ်စ်တို့က ၂၀၁၆ ခုနှစ်၊ပါမီးရပ်စ်အသင်းမှာ အတူတွဲဖက်ကစားခဲ့ဖူးတဲ့ အသင်းဖော်ဟောင်းနှစ်ဦး ဖြစ်ပါတယ်။
ဂျီးဆပ်စ်က “အရင်တုန်းက ကျွန်တော်နဲ့ မီနာတို့ ပါမီးရပ်စ်မှာ တွဲဖက်ကစားခဲ့ဖူးတာကို မင်းတို့လည်း သိကြမှာပါ။ ကျွန်တော်တို့အချင်းချင်းလည်း ရင်းနှီးခဲ့ကြပါတယ်။
ဒါတွေပြီးနောက်မှာ သူက ကျွန်တော့်ရင်ဘတ်ကို လက်ညှိုးထိုးပြီး ရိုင်းရိုင်းစိုင်းစိုင်းပြောဆိုတာမျိုးကို သူ ဘာကြောင့်လုပ်ခဲ့သလဲဆိုတာကို ကျွန်တော် နားမလည်နိုင်ပါဘူး။ ဘာကြောင့်လဲဆိုတာ တကယ်မသိပါဘူး။ ဒါတွေလုပ်ဖို့ သူ့ရဲ့အကြောင်းပြချက်က ဘာလဲဆိုတာ ကျွန်တော် မသိပါဘူး။
ကျွန်တော်လည်း ကလေးတစ်ယောက်မှမဟုတ်တာ၊ ဒါကြောင့် သူ့ကို ဒဲ့သွားရှင်းလိုက်ပါတယ်။ ပြီးတော့ ကျွန်တော်တို့ ပွဲကိုဆက်ကစားခဲ့ပါတယ်။ ဖြစ်ပျက်ခဲ့တာတွေကတော့ ဒါတွေပါပဲ”လို့ TNT Sports သတင်းဌာနနဲ့ တွေ့ဆုံစဉ်မှာ ပြောဆိုခဲ့ပါတယ်။
ပေါင် ၄၅ သန်းတန် တိုက်စစ်မှူးကတော့ အမ်းမရိတ်စ်ကလပ်နဲ့ စာချုပ်သက်တမ်းငါးနှစ်အတွင်း ပရီးမီးယားလိဂ်ဖလားအနိုင်ရဖို့ ရည်မှန်းထားတယ်လို့ ဆက်ပြောခဲ့ပါတယ်။
“ကျွန်တော့်ဘဝရဲ့ ရည်မှန်းချက်တွေကို ကျွန်တော်အမြဲတမ်း ကြိုက်နှစ်သက်ခဲ့ပါတယ်။ ဒီနေ့တစ်ရက်တည်း အတွက်သာမက ရေရှည်အတွက် စဉ်းစားတွေးတောရတာမျိုးကို ကျွန်တော်လုပ်လေ့ရှိပါတယ်။
ကျွန်တော် အာဆင်နယ်မှာ တစ်ရာသီ(သို့မဟုတ်) နှစ်ရာသီလောက်ပဲ နေဖို့ ရောက်လာတာ မဟုတ်ပါဘူး။ ငါးနှစ်ကြာ ကစားဖို့ပါ။ ဒါကပဲ ကျွန်တော် တွေးထားတဲ့ အကြောင်းအရာပါ။
ဒါကပဲ အင်္ဂလန်ဘောလုံးလောကရဲ့ အရမ်းလှပတဲ့သမိုင်းကြောင်းနဲ့ အစဉ်အလာကြီးမားတဲ့ကလပ်ဖြစ်တဲ့ အာဆင်နယ်ကို ရွေးချယ်ရတဲ့ အကြောင်းရင်းဖြစ်ပါတယ်။ ကံမကောင်းစွာနဲ့ဘဲ သူတို့က နည်းနည်းလေး ငြိမ်သက်နေခဲ့ရတာပါ။ အချိန်ကာလတစ်ခုကြာ အမှတ်ပေးဖလားကို အနိုင်မရခဲ့ပေမယ့် အသင်းက နှစ်တိုင်း တိုးတက်နေတာပါ။ အောင်ပွဲတွေအတွက် ဒီလိုစိန်ခေါ်မှုတွေ ကျွန်တော့်မှာ ရှိပါတယ်”လို့ ဂျီးဆပ်စ်က ဆက်ပြောခဲ့ပါတယ်။
#မီနာ #အာဆင်နယ် #အဲဗာတန် #ဂျီးဆပ်