အာမန်ဒို ဘရိုဂျာအနေနဲ့ နွေရာသီမှာ အသင်းက ထွက်ခွာဖို့ မမျှော်လင့်ကြောင်း တူချယ် ပြောကြား
10:55 AM, 21 July
ချဲလ်ဆီအသင်းနည်းပြ တူချယ်ဟာ ဝက်စ်ဟမ်းအသင်းက ခေါ်ယူဖို့ စိတ်ဝင်စားနေတဲ့ အသင်းရဲ့ ကစားသမား အာမန်ဒိုဘရိုဂျာအနေနဲ့ နွေရာသီမှာ အသင်းက ထွက်ခွာမှာကို မမျှော်လင့်ထားကြောင်း ပြောကြားလိုက်ပါတယ်။
ဘရိုဂျာဟာ မနှစ်က ဆောက်သမ်တန်အသင်းမှာ အငှားသွားကစားခဲ့ပြီး ပရီးမီးယားလိဂ်ပွဲစဉ် ၃၂ ပွဲ ကစားထားခဲ့ကာ ၆ ဂိုးသွင်းယူပေးနိုင်ခဲ့ပါတယ်။ ကစားသမားဟာ ပေါင် သန်း ၃၀ နဲ့ ဝက်စ်ဟမ်းအသင်းကို ပြောင်းရွေ့ဖို့ ကမ်းလှမ်းခြင်းခံထားရတယ်လို့ Football London သတင်းထောက် အဒန်နယူးဆင်က တနင်္လာနေ့က ပြောကြားခဲ့ပြီး ကစားသမားဟာ ချဲလ်ဆီးအသင်းနဲ့အတူ အမေရိက ခရီးစဉ်ကို လိုက်ပါသွားကာ အသင်းအနေနဲ့ စဉ်းစားသွားဖွယ်ရှိတယ်လို့ သိရပါတယ်။
ဒေးဗစ်မိုရက်ဟာ သူ့ရဲ့ ဝက်စ်ဟမ်းအသင်းတိုက်စစ်ပိုင်းအတွက်ဘရိုဂျာကို ခေါ်ယူချင်နေတာပါ။ ဝက်စ်ဟမ်းအသင်းဟာ ဆက်ဆူလိုအသင်းရဲ့ ကစားသမား ဂီရန်လူကာ ဆကာမက်ကာကိုလည်း ခေါ်ယူဖို့ ချိတ်ဆက်ထားပြီး ဝက်စ်ဟမ်းအသင်းကတော့ ကစားသမားနှစ်ယောက်စလုံးကို ခေါ်ယူနိုင်မယ်လို့ မျှော်လင့်နေပါတယ်။
သို့သော် ဝက်စ်ဟမ်းအသင်းအနေနဲ့ ဘရိုဂျာကို ခေါ်ယူနိုင်ဖို့ ဆွဲဆောင် ကမ်းလှမ်းထားပေမယ့် ချဲလ်ဆီးနည်းပြ တူချယ်ကတော့ ယခုနွေရာသီမှာ ဘရိုဂျာအနေနဲ့ အသင်းကထွက်ခွာမယ်ဆိုတာကို မမျှော်လင့်ထားဘူးလို့ ဆိုလိုက်ပါတယ်။
တူချယ်က Sky Sport မှာ
"ကျွန်တော့်အနေနဲ့ သူအသင်းကထွက်ခွာမယ်လို့ မထင်ထားပါဘူး။ သူ့အတွက် ကမ်းလှမ်းချက်တွေ စိတ်ဝင်စားမှုတွေကို ကျွန်တော်တို့ သိပါတယ်။ အသင်းပိုင်ရှင်ရယ် ၊ ကစားသမားရယ် ကျွန်တော်ရယ် အားလုံးအတူတူ ဆွေးနွေးပြီး ဆုံးဖြတ်သွားပါမယ်။ "
"သူအသင်းကိုရောက်တဲ့အခါမှာ သူဟာ ချဲလ်ဆီးကစားသမားတစ်ယောက်အဖြစ် အထင်ကြီးစရာကောင်းအောင် ကြိုးစားပါတယ်။ ဆောက်သမ်တန်မှာ အငှားကစားပြီးတဲ့နောက်မှာ သူဟာ သူ့ရဲ့ ကစားသမားဘဝကို နောက်တစ်ဆင့်တက်ချင်ပါတယ်။ ကံမကောင်းစွာပဲ သူဒဏ်ရာရခဲ့ပါတယ်။ အခုတော့ သူ့ကို စိတ်ဝင်စားတဲ့အသင်းတွေရှိလာပါပြီ။ ဘယ်လိုဆက်ဖြစ်သွားမလဲ ကြည့်ရပါမယ်။ သူဟာ အသင်းနဲ့လည်း စာချုပ်သက်တမ်းရှိပါသေးတယ်။ "
"ကျွန်တော်တို့မှာ ရွေးချယ်စရာ ကစားသမားတွေရှိပါတယ်။ ဒါပေမယ့် အာမန်ဒိုလို ကစားသမားမျိုးတော့ မဟုတ်ပါဘူး။ ပြီးခဲ့တဲ့ ရာသီကာ သူနဲ့ ဂယ်လာဟာကို အသင်းက စောင့်ကြည့်ခဲ့ပြီး သူတို့နဲ့ အသင်းအတွက် ဘာတွေ ကောင်းကျိုးရှိမလဲ ကြည့်ခဲ့ပါတယ်။ သူ အခုအသင်းမှာ အချိန်ခနကစားနေရပေမယ့် သူ့အတွက် ကောင်းတဲ့ အလားအလာရှိပါတယ်။ "
"သူဟာ ပရီးမီးယားလိဂ်မှာလည်း ကောင်းကောင်း ကစားထားရတဲ့ ကစားသမားတစ်ယောက်ဖြစ်ပါတယ်။ သူ့အခြေအနေကို ကျွန်တော်တို့ အထူးဂရုစိုက် စောင့်ကြည့်နေပါတယ်။ တစ်ဦးချင်းလည်း သေချာ ဂရုစိုက်ပါတယ်။ သူ့အတွက် အသင်းမှာ ကစားဖို့ အခြေအနေပေးမလား ၊ ဒါမဟုတ် သူပွဲကစားချိန် များများစားစားရဖို့ အငှားကစားသမားအဖြစ် ဆုံးဖြတ်သွားမလားဆိုတာ စောင့်ကြည့်နေပါတယ်။ "
လို့ တူချယ်ကဆိုပါတယ်။ ဝက်စ်ဟမ်းအသင်းဟာ ဂျက်ဆီလင်ဂတ်ကို ခေါ်ယူချင်နေပြီး နေယ်တင်ဟမ်ဖောရက်အသင်းကတော့ ဝက်စ်ဟမ်းအသင်းကို ကျော်ကာ လင်ဂတ်ကို ခေါ်ယူနိုင်ဖို့ အခြေအနေကောင်းနေပါတယ်။ အဲဗာတန် ၊လက်စတာ နဲ့ နယူးကာဆယ်အသင်းတို့ကလည်း ယူနိုက်တက်အသင်းနဲ့ စာချုပ်သက်တမ်းကုန်ဆုံးထားတဲ့ လင်ဂတ်ကို ခေါ်ယူချင်နေပါတယ်။
#ချဲလ်ဆီး #တူချယ် #ဘရိုဂျာ