မော်ရင်ဟို ရိုးမားအသင်းမှာအောင်မြင်တာက တိုက်ဆိုင်မှုမဟုတ်ကြောင်း စမောလင်း ပြောကြား

9:49 AM, 19 July

ရိုးမားအသင်းနောက်ခံလူ စမောလင်းက ၂၀၀၇ - ၀၈ နောက်ပိုင်း ပထမဆုံးအကြိမ် မော်ရင်ဟိုလက်အောက် ရာသီပြည့်ကစားနိုင်ခဲ့သလို ဆုဖလားလည်းကိုင်မြှောက်နိုင်ခဲ့ကာ တိုက်ဆိုင်မှုဆိုတာမရှိဘူးလို့ ထုတ်ဖော်ပြောကြားခဲ့ပါတယ်။

စမောလင်းဟာ ၂၀၂၀ တုန်းက ယူနိုက်တက်ကနေ ရိုးမားအသင်းထံပြောင်းရွှေ့ခဲ့တာဖြစ်ပြီး ပေါ်တူဂီသားနဲ့ ပြန်လည်ပူးပေါင်းခဲ့တာဖြစ်ပါတယ်။

မော်ရင်ဟိုဟာ ပရီးမီးယားလိဂ်ကလပ် တော့တင်ဟမ်အသင်းမှာ ၁၇ လကြာဖြတ်သန်းခဲ့ပြီးနောက် အီတလီကိုပြန်လာခဲ့တာဖြစ်ပြီး ရိုးမားအသင်းကို အဆင့် ၆ နေရာမှာ ရပ်တည်နိုင်အောင် စွမ်းဆောင်ပေးနိုင်ခဲ့ပါတယ်။

ထိပ်ဆုံး ၄ သင်းနေရာနဲ့လွဲချော်ခဲ့ပေမယ့်လည်း မော်ရင်ဟိုဟာ အသင်းကို ယူရိုပါကွန်းဖရန့်လိဂ်ရရှိအောင် စွမ်းဆောင်ပေးနိုင်ခဲ့ပါတယ်။

အသက် ၅၉ နှစ်သားဟာ ဂျီယိုဗင်နီပြီးနောက် ဥရောပဖလား ၅ လုံးရရှိတဲ့ ဒုတိယမြောက်နည်းပြဖြစ်လာခဲ့ကာ မတူညီတဲ့ ၄ သင်းမှာ ဆုဖလားတွေကိုင်မြှောက်နိုင်တဲ့ပထမဆုံးနည်းပြဖြစ်လာခဲ့ပါတယ်။

“နည်းပြက အတူတူပါပဲ။ သူက ဦးဆောင်နိုင်တဲ့သူပါ။ နှစ်အတော်ကြာလည်း အောင်မြင်မှုယူခဲ့တဲ့နည်းပြတစ်ဦးပါ။ 

သူ့လိုနည်းပြမျိုးက ပထမဆုံးရာသီမှာ အောင်မြင်မှုရယူနိုင်တာက တိုက်ဆိုင်မှုမဟုတ်ပါဘူး”လို့ စမောလင်က ပြောကြားခဲ့ပါတယ်။

ရိုးမားအသင်းဟာ အခြားတစ်ဖက်မှာ အလွတ်နဲ့ရမယ့် ဒိုင်ဘားလားကို ခေါ်ယူနိုင်တော့မှာဖြစ်ကာ ဆာဗီလာ ၊ မာတစ် ၊ ဆီလစ်တို့ကိုလည်း ခေါ်ယူထားပြီးဖြစ်ကာ အင်တာ ၊ ဂျူဗင် ၊ နာပိုလီ နဲ့ အေစီမီလန်တို့ကို အားပြိုင်နိုင်မယ်လို့ စမောလင်းက ယုံကြည်နေပါတယ်။

စမောလင်းရဲ့စာချုပ်သက်တမ်းက လာမယ့်ဇွန်လမှာကုန်ဆုံးမှာဖြစ်ပြီး ရိုးမားမှာဆက်နေမယ်လို့ အသက် ၃၂ နှစ်သားက အခိုင်အမာပြောကြားခဲ့ပါတယ်။

“ကျွန်တော့်ရဲ့အဓိကပစ်မှတ်က ကစားရဖို့ နဲ့ အသင်းကိုကူညီပေးနိုင်ဖို့ပါ။ ကျွန်တော်က အသုံးဝင်သေးတယ်လို့ ထင်ပါတယ်။ အသက်အရွယ်ကနေ မလွတ်မြောက်နိုင်ပါဘူး။ 

ဒါပေမယ့် ကျွန်တော် အနားယူသွားမှာမဟုတ်သလို ပွဲတိုင်းနီးပါးကစားနိုင်အောင် လုပ်ဆောင်သွားမှာပါ။ အသင်းအတွက်အမြဲတမ်း တတ်နိုင်သလောက်ပေးဆပ်သွားမှာပါ”လို့ စမောလင်းက ပြောကြားခဲ့ပါတယ်။

#ရိုးမား #မော်ရင်ဟို #စမောလင်း