ဘာစီလိုနာကို ပြောင်းရွှေ့ပြီးနောက် ရော်နယ်ဒင်ဟို၊ နေမာတို့ ခြေရာကို လိုက်နင်းဖို့ ပြင်ဆင်နေတဲ့ ရာဖင်ဟာ
9:46 AM, 15 July
ဘာစီလိုနာကို ပြောင်းရွှေ့ပြီးနောက် ရာဖင်ဟာက အခြားဘရားဇီးသားတွေဖြစ်တဲ့ ရော်နယ်ဒင်ဟို၊ နေမာတို့ ခြေရာကို လိုက်နင်းဖို့ ပြင်ဆင်နေတယ်လို့ သိရပါတယ်။ ဘာစီလိုနာ အသင်းဟာ ရာဖင်ဟာအတွက် လိဒ်ယူနိုက်တက်အသင်းနဲ့ သဘောတူညီမှုရရှိခဲ့ပြီဖြစ်ကာ ပေါင် ၅၆.၅၇ သန်း လောက်ပေးချေရဖွယ်ရှိနေပါတယ်။
အခုနွေရာသီအပြောင်းအရွှေ့မဖွင့်ခင်ကတည်းက ဘာစီလိုနာကို ပြောင်းချင်ခဲ့တာဖြစ်ပြီး ပရီးမီးယားလိဂ် ကလပ်တွေဖြစ်တဲ့ အာဆင်နယ်နဲ့ ချဲလ်ဆီးတို့က ချိတ်ဆက်ခဲ့သေးတာဖြစ်ပါတယ်။ ဘာစီလိုနာ အသင်းမှာ ယခင်က ဘရာဇီးသားတွေဖြစ်တဲ့ ဒင်ဟိုနဲ့ နေမာတို့ ကစားခဲ့သေးတာဖြစ်ပြီး အခုရာဖင်ဟာကလည်း သူတို့ခြေရာလေးကို လိုက်နင်းနိုင်ဖို့ အလိုရှိနေပါတယ်။
“ရော်နယ်ဒင်ဟို ဒီမှာ အောင်မြင်ခဲ့တာကို မြင်ခဲ့ရသလို နေမာလည်း ဒီမှာအောင်မြင်ခဲ့ပါတယ်။ ကျွန်တော် ဘရာဇီးသားတစ်ဦးအနေနဲ့ ဒီကိုလာခဲ့တာပါ။ အဲ့တာက ဂုဏ်ယူစရာပါ။ သူတို့ ၂ ဦးအောင်မြင်ခဲ့သလိုမျိုး အောင်မြင်နိုင်ဖို့ မျှော်လင့်ပါတယ်။ အိပ်မက်တွေ အမှန်တကယ်ဖြစ်လာခဲ့ပြီ။ ကျွန်တော့်အတွက်တင်မဟုတ်ပဲ မိသားစုနဲ့ သူငယ်ချင်းတွေအတွက်ဆိုလည်း မှန်ပါတယ်။ ကျွန်တော်ကလေးဘဝကတည်းက ဒီမှာကစားတာကို သူတို့မြင်ချင်ကြတာပါ။ အခုတော့ အမှန်တကယ်ဖြစ်လာခဲ့ပါပြီ။ ကျွန်တော် ဘာစီလိုနာအတွက်ဖြစ်နိုင်သမျှ လုပ်သွားမှာပါ”လို့ ရာဖင်ဟာက ပြောကြားခဲ့ပါတယ်။
ရာဖင်ဟာကတော့ ရန်းနက်စ်အသင်းထံကနေ လိဒ်ယူနိုက်တက်အသင်းထံပြောင်းရွှေ့လာခဲ့တာဖြစ်ပြီး ဘီယဲလ်ဆာ ၊ ဂျက်ဆီမာ့ချ်တို့လက်အောက်မှာ ခြေစွမ်းကောင်းတွေပြသနိုင်ခဲ့တာဖြစ်ပါတယ်။ လိဒ်အတွက် ၆၇ ပွဲမှာ ၁၇ ဂိုးအထိ သွင်းယူပေးနိုင်ခဲ့ကာ ဘရာဇီးသားက ဘာစီလိုနာကို အကောင်းဆုံးမြှင့်တင်ပေးနိုင်လိမ့်မယ်လို့ ယုံကြည်နေပါတယ်။
“ကျွန်တော် အရမ်းစိတ်လှုပ်ရှားနေပါတယ်။ ကျွန်တော်နိုင်ပွဲရတာကို ကြိုက်နှစ်သက်ပါတယ်။ ရှုံးတဲ့အချိန်တိုင်း လက်ခံရခက်ပါတယ်။ ကျွန်တော်အမြဲတမ်းနိုင်ပွဲရယူပေးနိုင်ဖို့ ကြိုးစားအားထုတ်သွားမှာပါ”လို့ ရာဖင်ဟာက ထပ်လောင်းပြောကြားခဲ့ပါတယ်။