မန်စီးတီးနဲ့ မပူးပေါင်းခင် မာဘယ်လာက နိုက်ကလပ်မှာ လွတ်လွတ်လပ်လပ် ပျော်နေတဲ့ ဟာလန်း
9:36 AM, 28 June
မန်စီးတီးတိုက်စစ်မှူးသစ် အာလင်း ဟာလန်းဟာ အားလပ်ရက်အတွင်း မာဘယ်လာမှာ လွတ်လွတ်လပ်လပ်အနားယူနေတာကို တွေ့ခဲ့ရပါတယ်။ နော်ဝေသားဟာ မိုမ်တိုဆိုတဲ့ နိုက်ကလပ်မှာ ကဲနေတာကို ဗီဒီယိုတစ်ခုထဲမှာ မြင်တွေ့ခဲ့ရပါတယ်။
ဗီဒီယိုထဲမှာတော့ ဟာလန်းတစ်ယောက် ခုန်နေတာကို မြင်တွေ့ခဲ့ရပြီး ဒေသခံ ဒီဂျေ Angelsanchezdjနဲ့ ဓာတ်ပုံရိုက်နေတာကိုလည်း တွေ့မြင်ခဲ့ရပါတယ်။ ဟာလန်းဟာ ပြီးခဲ့တဲ့ ရက်အနည်းငယ်အတွင်း မာဘယ်လာက ကမ်းခြေမှာ လူငယ်တွေနဲ့ ဘောလုံးကစားနေခဲ့ပြီးနောက် ဒုတိယအကြိမ်အဖြစ် ကလပ်မှာ မြင်တွေ့ခဲ့ရတာပါ။
လာမယ့်ရာသီ ပွဲကျပ်ကာလတွေမတိုင်ခင် နော်ဝေသားဟာ ယခုအချိန်မှာတော့ လွတ်လွတ်လပ်လပ်ပဲ အနားယူနေခဲ့ပါတယ်။ ဟာလန်းကို မန်စီးတီးက ယခုလအစောပိုင်းက တရားဝင်ကြေညာခဲ့ပြီး ၂၁နှစ်သားရဲ့ အပြောင်းအရွှေ့က ယခုနှစ်နွေရာသီ လူပြောအများဆုံး အပြောင်းအရွှေ့တစ်ခု ဖြစ်ခဲ့ပါတယ်။
ဟာလန်းဟာ ဒေါ့မွန်အတွက် ၈၉ ပွဲ ကစားရာမှာ ၈၆ ဂိုး သွင်းထားပြီး နော်ဝေအတွက် ၂၁ ပွဲ ကစားရာမှာ ဂိုး၂၀အထိ သွင်းထားခဲ့ပါတယ်။