လီဗာပူးကိုပြောင်းဖို့ လိဒ်စတားကို တိုက်တွန်းလိုက်တဲ့ ရီဗယ်ဒို
2:24 PM, 25 October
ဘရာဇီးဂန္ထဝင် ရီဗယ်ဒိုက လိဒ်စတား ရာဖင်ဟာအနေနဲ့ ကစားသမားဘဝ နောက်တစ်ဆင့်တက်နိုင်ဖို့ လီဗာပူးကိုပြောင်းသင့်တယ်လို့ အကြံပေးလိုက်ပါတယ်။ ဘရာဇီးသားဟာ ပြီးခဲ့တဲ့ရာသီနဲ့အခုရာသီမှာ ခြေစွမ်းကောင်းတွေပြသနိုင်ခဲ့ပြီးနောက် အသင်းကြီးတွေက မျက်စိကျနေကြပါတယ်။ ရာဖင်ဟာကတော့ ပြီးခဲ့တဲ့ရာသီပရီးမီးယားလိဂ် ၃၀ ပွဲမှာ ၆ ဂိုးသွင်း ၊ ၉ ဂိုးဖန်တီးပေးနိုင်ခဲ့ကာ ခြေစွမ်းကောင်းတွေ ပြသနိုင်ခဲ့တာ ဖြစ်ပါတယ်။
လီဗာပူး နဲ့ ယူနိုက်တက်တို့ဟာ အဆိုပါ အသက် ၂၄ နှစ်သားကိုချိတ်ဆက်နေပြီး အခုနွေရာသီမှာတော့ ဆက်ရှိနေခဲ့တာဖြစ်ပါတယ်။ ဒီရာသီမှာ ဘရာဇီးသားဟာ ၈ ပွဲမှာ ၃ ဂိုးသွင်းယူထားနိုင်ခဲ့ပါတယ်။ ဘာစီလိုနာတိုက်စစ်မှူးဟောင်း ရီဗယ်ဒိုက လီဗာပူးထံ ရာဖင်ဟာပြောင်းသင့်တယ်လို့ တိုက်တွန်းခဲ့ပါတယ်။
“ရာဖင်ဟာက ဘရာဇီးအတွက် အကောင်းဆုံးကစားပေးထားပါတယ်။ ပရီးမီးယားလိဂ်မှာ လိဒ်ယူနိုက်တက်အတွက် တောက်ပပြီးသားပါ။ လီဗာပူးက စိတ်ဝင်စားနေပြီး အဲ့ကိုပြောင်းဖြစ်မယ်ဆိုရင်တော့ ပွဲထွက်ခွင့်ရမှာမသေချာပေမယ့် ကစားသမားဘဝအတွက်တော့ ကြီးမားတဲ့ခြေလှမ်းတစ်ခုဖြစ်လာနိုင်ပါတယ်။ ပြီးတော့သူ့မှာ အသင်းကြီး တစ်သင်းအောက်မှာကစားနိုင်တဲ့အရည်အချင်းရှိနေပါတယ်”လို့ ရီဗယ်ဒိုက ပြောကြားခဲ့ပါတယ်။
လိဒ်ယူနိုက်တက်ဟာ ရာဖင်ဟာကို ၂၀၂၀ နွေရာသီတုန်းက ရန်းနက်စ်ကနေ ပေါင် ၁၇ သန်းနဲ့ ခေါ်ယူခဲ့တာဖြစ်ပါတယ်။