အပျော်လွန်ပြီး ခုန်ပေါက်အောင်ပွဲခံရာကနေ ပွဲကြည့်စင်ပါ ပြိုကျသွားရတဲ့အဖြစ်
10:43 AM, 18 October
ယမန်နေ့က ပရီးမီးယားလိဂ်မှာ တုန်လှုပ်စရာဖြစ်ရပ်တစ်ခုပေါ်ပေါက်ခဲ့သလို နယ်သာလန်ပြည်တွင်းလိဂ်မှာလည်း ထိတ်လန့်စရာဖြစ်ရပ်တစ်ခု ဖြစ်ပွားခဲ့ပြီး ဗီတက်စီပရိသတ်တွေ ခုန်ပေါက်အောင်ပွဲခံရာကနေ ပွဲကြည့်စင်ကြီး ပြိုကျသွားတာပါ။
ဗီတက်စီဟာ အဝေးကွင်းမှာ နီမီဂျန်အသင်းကို ၁-၀ ဂိုးနဲ့အနိုင်ရပြီးနောက် ပွဲအပြီးမှာ ဗီတက်စီကစားသမားတွေက ဧည့်သည်ပရိသတ်တွေရှိရာ ပွဲကြည့်စင်နားလာပြီး အတူတူအောင်ပွဲခံခဲ့ကြပါတယ်။ ဗီတက်စီပရိသတ်တွေက ခုန်ပေါက်အောင်ပွဲခံခဲ့ကြလို့ ပွဲကြည့်စင်လည်း ပြိုကျသွားခဲ့ပြီး ပရိသတ်အများစု လဲကျသွားလို့ ကစားသမားတွေလည်း စိုးရိမ်သွားကြပါတယ်။
ဒါပေမဲ့ ပရိသတ်တွေကတော့ ဆက်လက်အောင်ပွဲခံခဲ့ကြပြီး ဒဏ်ရာ ရသွားတာမျိုးလည်းမရှိပါဘူး။ ဘယ်သူမှဒဏ်ရာမရခဲ့ပေမယ့် နီမီဂျန်မြို့တော်ဝန်ကတော့ အဲဒီဖြစ်ရပ်နဲ့ပတ်သက်လို့ စုံစမ်းစစ်ဆေးဖို့ တောင်းဆိုခဲ့ပါတယ်။ ဗီတက်စီဟာ အဲဒီပွဲအနိုင်ကြောင့် အဆင့် ၆နေရာ တက်လှမ်းလာပြီး ကြာသပတေးနေ့မှာ ယူရိုပါလိဂ်ကွန်းဖရန့်ပွဲစဉ်အဖြစ် တော့တင်ဟမ်နဲ့ရင်ဆိုင်ရမှာဖြစ်ပါတယ်။