၁လ အတွင်းမှာဖြစ်ပျက်သွားနိုင်တဲ့ အပြောင်းအရွှေ့များ
12:49 PM, 9 July
လက်ရှိအပြောင်းအရွှေ့ရာသီကတော့ ကစားသမားတွေကော နည်းပြတွေကော အလုပ်ရှုပ်စေမယ့် အပြောင်းအရွှေ့ကာလတစ်ခု ဖြစ်လာဖွယ်ရှိနေပါတယ်။
ပရီးမီးယားလိဂ်ထိပ်သီးကလပ်အသင်းတွေဖြစ်တဲ့ မန်ယူ၊ စပါးနဲ့ အာဆင်နယ်အသင်းတို့ဟာ လာမယ့်ရာသီသစ်အတွက် အသင်းကို ကစားသမားသစ်တော်တော်များများနဲ့အားဖြည့်ဖို့စီစဉ်နေကြတာဖြစ်ပါတယ်။
စပေါ့မေးလ်သတင်းဌာနကတော့ ပရီးမီးယားလိဂ်မှာ လာမယ့်သြဂုတ်လ ၈ ရက်နေ့မတိုင်ခင် ထိပ်တန်းအပြောင်းအရွှေ့ ၁၀ခုကိုမြင်တွေ့ရဖွယ် ရှိနေတယ်လို့ဖော်ပြခဲ့ပါတယ်။
ဇာဟာ - ခရစ္စတယ်ပဲလေ့စ် >>> အာဆင်နယ်
-----------------------------------------------
ခရစ္စတယ်ပဲလေ့စ်တောင်ပံကစားသမား ဇာဟာ ကတော့ ဒီနှစ်နွေရာသီအပြောင်းအရွှေ့ကာလမှာ အာဆင်နယ်အသင်းကခေါ်ယူဖို့ ထိပ်တန်းပစ်မှတ်အဖြစ်သတ်မှတ်ထားခဲ့တာဖြစ်ပါတယ်။ အာဆင်နယ်အသင်းဟာ ပထမတစ်ကြိမ် ပဲလေ့စ်အသင်းထံပေါင် ၄၀ သန်းနဲ့ ကမ်းလှမ်းခဲ့ပေမယ့် ပယ်ချခံခဲ့ရပြီး အပြောင်းအရွှေ့ကာလနောက်ဆုံးအချိန်အထိ စောင့်ကြည့်ရဖွယ်ရှိနေပါတယ်။
လက်ရှိအချိန်မှာတော့ ပဲလေ့စ်တောင်ပံကစားသမား ဇာဟာအနေနဲ့ အိုင်ဗရီကို့စ်အသင်းနဲ့ အတူ အာဖရိကနေးရှင်းဖလားဆင်နွှဲနေပြီး ပဲလေ့စ်အသင်းကတော့ ပေါင် ၈၀ သန်းထက်နည်းတဲ့ ကမ်းလှမ်းမှုတွေကိုရောင်းချဖွယ်မရှိပဲ အာဆင်နယ်အသင်းအနေနဲ့ ခက်ခက်ခဲခဲ ခေါ်ယူရဖွယ်ရှိနေပါတယ်။
စီဘယ်လော့စ် - ရီးရဲလ်မက်ဒရစ် >>>>> စပါး
-------------------------------------------------------
ရီးရဲလ်မက်ဒရစ်အသင်းကတော့ ငွေကြေးလိုအပ်ချက်အချို့ရှိနေတာကြောင့် ကစားသမားတော်တော်များများကိုပြန်လည်ရောင်းချဖို့စီစဉ်နေကာ ကွင်းလယ်ကစားသမား စီဘယ်လော့စ်ကိုလည်းရောင်းချဖို့ပြင်ဆင်နေပါတယ်။ အဆိုပါအသက် ၂၂နှစ်သားကိုတော့ နည်းပြ ပိုချက်တီနိုက ခေါ်ယူဖို့စိတ်ဝင်စားနေပြီး ကွင်းလယ်ကစားသမား အဲရစ်ဆင်ရဲ့နေရာမှာ အစားထိုးဖို့စီစဉ်နေတာဖြစ်ပါတယ်။
မက်ဂွါရီ - လက်စတာ >>>>> မန်ယူ
--------------------------------------------
မန်ယူအသင်းကတော့ လာမယ့်ရာသီသစ်အတွက်အသင်းနောက်တန်းကိုပြင်ဆင်ဖို့စီစဉ်နေပြီး လက်စတာနောက်ခံလူ မက်ဂွါရီကို ခေါ်ယူဖို့ပြင်ဆင်နေတာဖြစ်ပါတယ်။ အင်္ဂလန်သားကတော့ ပြီးခဲ့တဲ့ရာသီကလက်စတာ အသင်းနဲ့အတူခြေစွမ်းကောင်းပြသနိုင်ခဲ့တာကြောင့် မန်ယူအသင်းက ခေါ်ယူလိုနေပြီး အနည်းဆုံးပေါင် ၈၀ သန်းအထိ ပေးချေရဖွယ်ရှိနေပါတယ်။ မန်စီးတီးအသင်းကလည်း အဆိုပါလက်စတာနောက်ခံလူကို ခေါ်ယူလိုနေပြီး တန်ကြေးအနည်းငယ်များနေတာကြောင့် နောက်ဆုတ်သွားခဲ့တာဖြစ်ပါတယ်။
ဒါကြောင့် လက်ရှိအချိန်မှာတော့ မန်ယူ အသင်းတစ်သင်းသာ ကျန်ရှိတော့တာဖြစ်ပါတယ်။
နီကိုလက်စ် ပီပီ - လိုင်လီ >>>> လီဗာပူး
-----------------------------------------------
လီဗာပူး အသင်းကတော့ ပြီးခဲ့တဲ့ရာသီတုန်းက ပရီးမီးယားလိဂ်ချန်ပီယံဆုနဲ့လွဲချော်ခဲ့ပေမယ့် ချန်ပီယံလိဂ်ဖိုင်နယ်မှာတော့ စပါးအသင်းကို အနိုင်ရရှိပြီး ဆုဖလားကိုသိမ်းပိုက်နိုင်ခဲ့ပါတယ်။ နည်းပြ ကလော့ကတော့ လာမယ့်ရာသီသစ်မှာ အသင်းရဲ့အဓိက ကစားသမားတွေဖြစ်တဲ့ ဆာလတ် ၊ မာနေး ၊ ဖာမီနိုတို့တာဝန်အနည်းငယ်လျော့ကျစေဖို့အတွက် လိုင်လီတောင်ပံကစားသမား ပီပီကိုခေါ်ယူဖို့စိတ်ဝင်စားနေတာဖြစ်ပါတယ်။
ပြီးခဲ့တဲ့ရာသီက လိုင်လီအသင်းနဲ့အတူ သွင်းဂိုး ၂၂ဂိုး ဂိုးဖန်တီးမှု ၁၁ကြိမ်အထိပြုလုပ်နိုင်ခဲ့တဲ့ အဆိုပါကစားသမားကိုတော့ လိုင်လီအသင်းအနေနဲ့ ဈေးပေါပေါနဲ့ရောင်းချဖွယ်မရှိတာဖြစ်ပါတယ်။
မက်စီ ဂိုးမက်ဇ် - ဆယ်လ်တာဗီဂို >>>>> ၀က်စ်ဟမ်း
------------------------------------------------------
ဝက်စ်ဟမ်းကတော့ အသင်းကနေထွက်ခွာသွားခဲ့တဲ့ တိုက်စစ်မှူး အနော်တိုဗစ်ရဲ့နေရာမှာအစားထိုးဖို့အတွက် ဆယ်လ်တာဗီဂိုတိုက်စစ်မှူး မက်စီ ဂိုးမက်ဇ်ကိုခေါ်ယူဖို့ပြင်ဆင်နေပါတယ်။ အဆိုပါကစားသမားရဲ့လက်ရှိတန်ကြေးကတော့ ပေါင် ၄၄.၅သန်း အထိရှိနေပြီး ၀က်စ်ဟမ်းအသင်းကလည်း တန်ကြေးအတိုင်းပေးချေခေါ်ယူဖွယ်ရှိနေပါတယ်။ ဒါပေမယ့်လည်း အခြားတစ်ဖက်မှာတော့ အဆိုပါတိုက်စစ်မှူးကို ဗလန်စီယာအသင်းကလည်း ခေါ်ယူလိုနေတာကြောင့် ၀က်စ်ဟမ်းအသင်းအနေနဲ့ အလျင်အမြန်ခေါ်ယူရဖွယ်ရှိနေပါတယ်။
ဇူးမား - ချဲလ်ဆီး >>>>> အဲဗာတန်
-----------------------------------------------
အဲဗာတန်အသင်းကတော့ ချဲလ်ဆီးအသင်းကနေအငှားနဲ့လာရောက်ကစားနေတဲ့ နောက်ခံလူ ဇူးမားကိုအပြီးသတ်ခေါ်ယူလိုနေပါတယ်။
အဆိုပါကစားသမားလေးဟာ ပြီးခဲ့တဲ့ရာသီတုန်းကအသင်းမှာခြေစွမ်းပြကစားနိုင်ခဲ့တာကြောင့် နည်းပြ မာကိုဆေးလ်ဗားကခေါ်ယူဖို့ မျက်စိကျနေတာဖြစ်ပါတယ်။ ဒါပေမယ့်လည်း အခြားတစ်ဖက်မှာက ချဲလ်ဆီးအသင်းဟာ အပြောင်းအရွှေ့မှာ လူဝယ်ခွင့်ပိတ်ပင်ခံထားရတာကြောင့် အဲဗာတန်အသင်း အနေနဲ့ ခေါ်ယူဖို့အနည်းငယ်ခက်ခဲဖွယ်ရှိနေပါတယ်။
တီယာနေး - ဆဲလ်တစ် >>>>> အာဆင်နယ်
-----------------------------------------------
အာဆင်နယ်အသင်းဟာ ဆဲလ်တစ်အသင်းရဲ့ဘယ်နောက်ခံကစားသမားလေး တီယာနေးကို ခေါ်ယူဖို့ကြိုးပမ်းနေပါတယ်။ နိုင်ငံအသင်းဖော် ရော်ဘတ်ဆန်အနေနဲ့ လီဗာပူးအသင်းမှာ အောင်မြင်မှုတွေရရှိနေတာကြောင့် တီယာနေးအနေနဲ့ အဆိုပါခြေရာအတိုင်းလိုက်နင်းနိုင်ဖို့ အတွက် အာဆင်နယ်အသင်းထံပြောင်းရွှေ့လိုနေတာဖြစ်ပါတယ်။ စပေ့ါမေးလ်သတင်းဌာနကတော့ ဆဲလ်တစ်အသင်းဟာ ကစားသမားလေးအတွက် ပေါင် ၂၅သန်းအထိ အလိုရှိနေပြီး အဆိုပါပမာဏသာရရှိပါက ရောင်းချသွားဖွယ်ရှိနေတယ်လို့ဖော်ပြခဲ့ပါတယ်။
ဆက်ဇနွန် - ဖူလ်ဟမ် >>>> စပါး
-------------------------------------
အသက် ၁၉နှစ် အရွယ် အင်္ဂလန်နောက်ခံလူကိုတော့ စပါးအသင်းကခေါ်ယူဖို့ချိတ်ဆက်နေတာဖြစ်ပါတယ်။ လက်ရှိကစားသမားလေးနဲ့ ဖူလ်ဟမ်အသင်းတို့ကြားစာချုပ်သက်တမ်း ကုန်ဆုံးဖို့နီးကပ်လာခဲ့တာကြောင့် စပါးအသင်းကခေါ်ယူဖို့ချိန်ရွယ်လာတာပါ။ ဒါပေမယ့် ဖူလ်ဟမ်အသင်းကတော့ ကစားသမားလေးကိုလွယ်လွယ်နဲ့ထွက်ခွာခွင့်ပေးဖွယ်မရှိပဲ အသင်းမှာဆက်ထိန်းထားနိုင်ဖို့ပြင်ဆင်နေတာဖြစ်ပါတယ်။
ဖာနန်ဒက်စ် - စပို့တင်း >>>>> မန်ယူ
-------------------------------------------
မန်ယူအသင်းကတော့ နောက်တန်းနေရာအပြင် ကွင်းလယ်နေရာကိုလည်းပြင်ဆင်ဖို့စီစဉ်နေတာပါတယ်။ အသင်းရဲ့အဓိက ကွင်းလယ်ကစားသမား ပေါ့ဂ်ဘာအနေနဲ့ ထွက်ခွာဖွယ်ရှိနေတာကြောင့်လည်း အစားထိုးဖို့အလိုရှိနေတာဖြစ်ပါတယ်။ နောက်ဆုံးသတင်းတွေအရတော့ မန်ယူအသင်းဟာ ကစားသမားနဲ့ တစ်ပတ်လုပ်ခပေါင် ၁သိန်းနဲ့ပုဂ္ဂိုလ်ရေးသဘောတူညီမှုရရှိခဲ့ပြီးဖြစ်တယ်လို့ဖော်ပြနေကြပြီး စပို့တင်းအသင်းနဲ့သာ ပြောင်းရွှေ့ကြေးညှိနှိုင်းဖို့ ကျန်ရှိတော့တာဖြစ်တယ်လို့ဖော်ပြခဲ့ပါတယ်။
နသန် အကီ - ဘုန်းမောက် >>>>> မန်စီးတီး
----------------------------------------------
မန်စီးတီးနည်းပြ ဂွာဒီယိုလာကတော့ အသင်းခေါင်းဆောင် ကွန်ပနီရဲ့နေရာမှာ လက်စတာနောက်ခံလူ မက်ဂွါရီကိုခေါ်ယူဖို့အလိုရှိခဲ့ပေမယ့် တန်ကြေးများပြားနေတာကြောင့် ဘုန်းမောက်နောက်ခံလူ နသန်အကီကိုခေါ်ယူဖို့ပြင်ဆင်လာခဲ့ပါတယ်။ အဆိုပါကစားသမားလေးရဲ့တန်ကြေးက ပေါင် ၄၀ သန်းသာ ရှိတာကြောင့် မန်စီးတီးအတွက် အလွယ်တကူခေါ်ယူနိုင်တဲ့အနေအထားတစ်ရပ်မှာရှိနေပါတယ်။
လက်ရှိစီးတီးအသင်း နောက်တန်းမှာတော့ ဂျွန်စတုန်း ၊ အော်တာမန်ဒီ ၊ လာပေါ်တေးတို့ရှိနေပြီး တကယ်လို့ အကီသာရောက်ရှိလာပါက အော်တာမန်ဒီအနေနဲ့ရောင်းချခံရဖွယ်ရှိနေပါတယ်။